“Mos e përmend Ramush Haradinajn”, ambasadori i Shqipërisë i qep gojën Rusisë

8 muaj më parë
“Mos e përmend Ramush Haradinajn”, ambasadori i Shqipërisë i qep gojën Rusisë

“Mos e përmend Ramush Haradinajn se ai nuk u fsheh, la postin e kryeministrit, dhe shkoi vetë në Hagë kur u akuua – a janë gati rusët e akuzuar për ngjarjet në Ukrainë të bëjnë të njëjtën gjë?”

Nga Ruben Avxhiu- Në seancën e djeshme në Këshillin e Sigurimit për institucionet e drejtësisë ndërkombëtare dhe mekanizmit të gjykatave, Shqipëria kishte shumë për të thënë.

Ambasadori Ferit Hoxha solli shembullin e problemeve në ish-Jugosllavi si shembull i nevojës për institucione që ndëshkojnë protagonistet e agresioneve.

Ai bëri thirrje që puna e drejtësisë të vazhdojë dhe të mos ketë afate skadimi, por nënvizoi edhe një pikë tjetër. Veprimi i drejtësisë ndaj antagonistëve nuk do të ketë sukses, nëse vazhdohet me glorifikimin e tyre, kur udhëheqës politikë përpiqen të manipulojnë historinë dhe të pretendojnë se ngjarjer në vende si Vukovar, Srebrenicë, Reçak etj nuk kanë ndodhur.

Në fund, duke iu përgjigjur aludimeve nga pala ruse për përfshirje të Shqipërisë dhe shqiptarëve në çështjen e Kosovës e, ai tha se kjo ishte një “ovërdozë e një fantazie të sëmurë”.

“Kjo që dëgjuat për vendin tim”, tha Ambasadori Hoxha, “ka po aq besueshmëri sa ato që dëgjuat po nga ky delegacion se si ‘në Ukrainë nuk ka lftë’ apo se ‘ukrainasit po eliminojnë veten’”.

Ai i tha delegacionit rus që të mos e zinte në gojë ish-kryeministrin e Kosovës, Ramush Hardinajn sepse ai u gjykua dy herë tashmë dhe të dy herët është shpallur i pafajshëm.

“Ai nuk u fsheh, nuk u arratis, dha dorëheqjen nga posti i kryeministrit, dhe iu dorëzua vetë drejtësisë, u përball me faktet, fitoi dhe tani është i lirë.”

“A do ta bëjnë të njëjtën gjë, ushtarët dhe politikanët rusë të akuzuar për krimin e agresionit dhe krime të tjerë serioze?”, tha Ambasadori Ferit Hoxha.

Mesiguri akuzat ruse kishin të bënin me tymnajën për “shtëpinë e verdhë” në Shqipëri dhe të tjera maskarada të përfshira në raportin famëkeq të Dick Marty-t.

Gjykata për Krimet e Luftës në Jugosllavi ka kryer hetime të gjera në Shqipëri, tha ambasadori. “Hetime në mënyrë të lirë, të hapur dhe nuk gjeti asgjë. As atëhere, as më vonë, e asnjëherë, për arsyen e thjeshtë se ato akuza ishin pa asnjë bazë. Faleminderit!”