Ndër surprizat më të bukura të skuadrës së Stefano Piolit në sezonet e fundit është sigurisht Fikayo Tomori. Pasi mbërriti në huazim në janar 2021 mes skepticizmit të përgjithshëm, ai shpejt u dëshmua të ishte një përforcim i madh për mbrojtjen.
Nuk kishte asnjë dyshim kur bëhej fjalë për blerjen e kartonit të tij për mbi 28 milionë eurot e kerkuara nga Chelsea. Anglezi është bërë një titullar dhe gjithashtu një idhull për tifozët e Milanit.
Ai ia doli mirë me të gjithë partnerët e mbrojtjes që bënin radhën përkrah tij. Sigurisht që ishte e rëndësishme për të që të ishte në gjendje të punonte me një koleg me përvojë si Simon Kjaer, një lider i vërtetë si dhe një mbrojtës i mirë.
Në pjesën e fundit të këtij kampionati u bashkua me Pierre Kalulu dhe ishte radha e tij të drejtonte shokun e tij të skuadrës, i cili megjithatë direkt tregoi potencialin. Të dy së bashku bënë shumë mirë dhe golat e shënuar ishin shumë të paktë, meritat janë edhe të tyre.
Milani synon të fokusohet me vendosmëri te Tomori edhe për të ardhmen. Pavarësisht se ka nënshkruar kontratën vetëm në vitin 2021, tashmë po qarkullojnë zëra për një rinovim të mundshëm. Marrëveshja aktuale është e vlefshme deri në qershor 2025 dhe do të zgjatet deri në vitin 2027.
Mund të ketë edhe një rregullim page, pasi sot fiton rreth 2 milionë euro neto në sezon. Ndërkohë Ivan Gazidis për BBC konfirmoi se Tomori është një element shumë i rëndësishëm për Milanin:
“Fikayo ka qenë i jashtëzakonshëm gjatë gjithë sezonit. Ai është absolutisht një shtyllë për këtë ekip. Ai është një nga lojtarët mbi të cilët do të donim të ndërtonim ekipin tonë, ai ka qenë një fuqizim fantastik brenda dhe jashtë fushës”.
Gazidis, shefi ekzekutiv i kuqezinjve, nuk ka dyshime: ish-mbrojtësi i Chelseat do të qëndrojë. Ish-CEO i Arsenalit foli gjithashtu në përgjithësi për qëllimin e ardhshëm të Milanit: “Evropa është një pjesë shumë e rëndësishme e ADN-së sonë. Hapi ynë i ardhshëm është të bëhemi më konkurrues në Evropë”. Synimi është padyshim që të zhvillohet një Champions League ndryshe nga ajo e fundit, ku kuqezinjtë dolën në fazën e grupeve!
